Tierra Aragonesa. Identidad y soberanía

• Foro
• Blogs
• Bideos
• Galería Fotografica
• Facebook
• Afillar-se
• Ficha Simpatizant
• Boletín Notizias
• Aria Pribata
• Campaña Firmas
• Campaña Fueros
• Decumentos
• Botiga
• TA en a Prensa
• Fe a tuya proposa
• Ayuta economica
• Da-nos a tuya opinión
• Organizazión

Un nuebo fuero aragonés: clau de present y de futuro

Parti d’os fuers aragoneses contina bichent en o tocante á materia zebil, tenendo espezial importanzia en custions d’erenzios y suzesions patrimonials. En Aragón se puede testar de traza desigual, grazias á testos legals d’orichen meyebal. Una lechislazión que establexe a mayoría d’edat ta determinatas custions á las 14 añadas, y ye compatible con a lechislazión española seguntes o establito en a disposizión adizional segunda de l’autual Constituzión Española.

Por atro costato, o pueblo basco ha bisto restablitos os suyos fuers con a constituzión de 1978, y a Comunidat Foral de Nabarra perén los ha tenito bichents. En 1978, con a promulgazión d’a nueba Constituzión, Euskadi beyó restablitos os suyos Fuers istoricos, d’os cualos fazió una adautazión. Por ixe motibo, tanto Euskadi como a Comunidat Foral de Nabarra mantienen Faziendas Forals, á trabiés d’as cualas replegan a totalidat d’os impuestos, como lo de l’IRPF u o de Soziedatz, mientres que iste dreito lis ye biedato de raso á la resta d’as comunidatz autonomas d’o territorio español, aduitando-se de contino que son competenzias esclusibas de l’Estato.

En concreto, en o caso d’os fuers bascos, a disposizión derogatoria d’a Constituzión en o suyo alpartato segundo, aduita á esprés tot ixo que en ixe inte estase bichent y que afeutase á las probinzias de Bizcaya, Guipuzcoa y Alaba, en o Reyal Decreto de 25 d’otubre de 1839. Con o cualo, quedaban automaticament restablitos.

A razón churidica que da á ista disposizión ye que a derogazión d’istos fuers se reyalizó como produto d’una guerra. O mesmo argumento puede aplicar-se á o caso d’a derogazión d’os fuers aragoneses.

Si bi abese una gran mayoría sozial en Aragón, no estarba difízil allora, dende una ambiesta lechislatiba, una modificazión d’a constituzión española, como si estase un articlo derogatibo, en os siguients terminos: “En tanto que podesen conserbar bella bichenzia, se consideran definitibament aduitatos os Reyals Decretos de 27 y 29 de chunio de 1707 en tot ixo que podese afeutar á la Comunidat Autonoma d’Aragón”.

Bi ha qui dirá que remuntar-se agora á fa tres sieglos ta demandar bella cosa, ye bibir en Atapuerca, manimenos, muitos d’os que fan ista afirmazión, no dandaliarán en reclamar o Peñón de Chibraltar, zedito á Gran Bretaña dimpués d’o tratato d’Utrech. Consecuenzia istorica d’o tratato d’Utrech ba estar l’aplicazión efeutiba d’os Reyals Decretos de Nueba Planta que abolión os nuestros fuers, ya que ba suposar o reconoximiento de Zelipe V como rei d’España por os países en conflito, y por tanto as lais que ba promulgar se ban fer de raso efeutibas.

Tanimientres charramos d’istoria, muitas interpresas que desembolican autibidatz economicas en Aragón, mantienen as suyas seus zentrals en Nabarra, y as suyas seus sozials trebutando á la Fazienda Foral Nabarra y otenendo bentachas fiscals. Grazias á os suyos fuers, Nabarra y Euskadi mantienen importants bentachas competitibas respeutibe á Aragón en materia economica.