Tierra Aragonesa. Identidad y soberanía

Semos soberanistas

En un mundo con recursos naturals cada begata más raditos, en Aragón nos trobamos con un eterno pleito por l'augua, y un pleito que empezipia por a enerchía, antimás d'un entorno menazato por o calentamiento global, d'impredezibles consecuenzias a escala planetaria.

Os aragoneses semos ya cansos de lamentar-nos, de preguntar: por qué no nos fan tal carretera u tal escuela? Debemos pasar a estar coszients de que Aragón ye un territorio Rico y de denguna traza pobre. O bitimismo debe quedar relegato por una sola ideya: "Queremos construyir o nuestro futuro nusatros mesmos" . Ista afirmazión a sustenemos en o siguient:

·         Aportamos totz os años diners ta o fundo de Compensazión interterritorial , mientras se quedan muitas imbersions nezesarias ta o desembolique de o territorio aturatas durant años.

·         A inmensa mayoría de as grans interpresas que reyalizan autibidatz economica en Aragón, tienen os suyos domizilios sozials difuera , (banca, compañías enercheticas, turisticas, costrutoras, grans superfizies comerzials, editorials, telecomunicazions, aseguradoras, tresportes de biachers...) con o cual nos ye muito difízil saper esautament. Si en os cálculos fiscals se calculase de traza independient os balanzes en Aragón de todas istas interpresas, i parárbanos cuenta de que l'alportazión ye muitismo mayor.

·         No semos dueños de os nuestros propios recursos naturals , ya que istas competenzias son esclusibas de o Estato español. No controlamos buena parti de os benefizios deribatos de a produzión d'enerchía idroeleutrica, eyolica u gas natural.

O soberanismo politico y conomico, sinifica simplament poder dezidir y disposar sobres os fruitos de a nuestra riqueza economica, atender as nezesidatz internas y de desembolique sozial d'Aragón y de dezidir qué, cuánto y cómo se comparte con os nuestros bizins . A soberanía politica en a prautica implicarba enantes tals como:

·         Recaudar plenament totz os impuestos por asolutament todas as autibidatz economicas reyalizatas en Aragón , por o cual tenérbanos a nuestra Fazienda propia, a nuestra Tresorería Cheneral de a Seguridat Sozial y recaudárbanos impuestos como lo de soziedatz, espezials como lo de a gasolina, alcol, tabaco, chuego, tenérbanos os nuestros propios fundos de pensions, etz...Debemos meter fin a o colonialismo economico de o que semos bitimas.

·         Estar dueños de os nuestros recursos naturals.

      O cual, entre atros muitos benefizios economicos y sozials, empacharba definitibament, que puedan reyalizar-se trescoles u trasferenzias idricas dende os nuestros ríos, y costruyir barrenatos entibos en as nuestras montañas.

·         Poder dizidir sobre as nuestras propias infraestruturas, tals como as ferrobiyarias, asinas como a chestión de os nuestros airopuertos.

L'airopuerto de Zaragoza, ye muito malfurriato, y grazias a la politica estatal, se pretende que asinas contine, de traza que un importantismo motor ta la nuestra economía como poderga estar iste airopuerto, permanexe trancato, ya que se da preferenzia a atros. A inautibidat d'un airopuerto, tamién inzide en a cantidat d'impuestos que NO se'n recaudan.

·         Reduzir sustanzialment o territorio ocupato por istalazions melitars en o nuestro territorio.

      O 2% de a superfizie total d'Aragón, y más de o 40% de o monezipio de Zaragoza, son ocupatas por istalazions melitars, improdutibvas sozial y economicament. A soberanía politica, serbirba ta meter fin a ista situazión.

·         Reyalizar una politica economica independient a la de o Estato. Ye nezesario tresformar o modelo economico de o nuestro país, alazetato en gran mida en a costruzión y a especulazión de o suelo sin de mugas, en una economía de mena produtiba. A protezión de o ziudadano como consumidor, una empenta reyal de a chiqueta y meyana interpresa, y una reforma legal de o sistema finanziero aragonés ta prebenir o eszeso d'inyezión de liquidez en o mercato, y por tanto, de borbollas economicas de desatrosas consecuenzias, son puntos claus ta o diseño d'un nuebo modelo economico en Aragón.

·         Un Aragón muito millor ta totz: A más diners, millors prestazions sozials: Más y millor educazión, sanidat, tresportes, infraestruturas, sistema chudizial propio, una politica enfilata ta o pleno emplego. En definitiba un Estato de o Bienestar Aragonés que tienga muito más que ofrexer a os aragoneses.

siguient