Tierra Aragonesa. Identidad y soberanía

• Foro
• Blogs
• Bideos
• Galería Fotografica
• Facebook
• Afillar-se
• Ficha Simpatizant
• Boletín Notizias
• Aria Pribata
• Campaña Firmas
• Campaña Fueros
• Decumentos
• Botiga
• TA en a Prensa
• Fe a tuya proposa
• Ayuta economica
• Da-nos a tuya opinión
• Organizazión

Aragón en o Mundo

Aragón, como nazión, no puede quedar mirando-se nomás aintro d’o suyo territorio. O nuestro proyeuto de Construzión Nazional d’Aragón consiste tamién en retornar-li á Aragón a suya proyeuzión internazional. Como pueblo, emos d’estar nusatros mesmos qui catemos enta o mundo, que nos conoxcan y sigamos conoxitos. En l’autualidat, a riqueza d’as nazions pende en o suyo grau d’internazionalizazión: a economía, o torismo, o desembolique teunolochico y a imbestigazión zientifica son os alazetz d’as soziedatz más desembolicatas.

Estar conoxitos en o mundo, y por qué, ye de bital importanzia. Istoricament estiemos tierra de toleranzia y combibenzia de culturas, entre chodigos, arabes y cristians. Recuperar ixe esprito, que carauterizaba á Aragón, y que encara contina, ya que ísta no’n ye tierra de luitas razials u relichiosas, y dar-li proyeuzión internazional á trabiés d’una adecuata aizión politica de gubierno, estarba la nuestra millor tarcheta de besita en l’estranchero.

A marca “Aragón” ha de tener a suya propia personalidat, no nomás como materia d’aizión politica. O desembolique d’alcuerdos comerzials internazionals, a proyeuzión d’os produtos aragoneses en l’estranchero, y por tanto d’as nuestras interpresas, como por exemplo lo torismo, penden á la fin en o conoximiento que se tienga d’Aragón como ente esferenziato. Aragón, un país por a toleranzia y a paz, ye un país que puede tener muito á dizir en temas como:

1.- A paz internazional: recuperando lo suyo papel por a combibenzia que istoricament perén teniemos.

2.- Os dreitos d’as minorías y d’os pueblos indichenas d’o mundo, d’as suyas culturas y as suyas luengas patrimonials. Os aragoneses tenemos a oportunidat istorica de salbar un patrimonio lingüistico y cultural d’a suya acotoladura, como ye l’aragonés, serbir d’exemplo y modelo y autuar alufrando ixa fin dende una ambiesta de solidaridat internazionalista.

3.- A solidaridat internazional. Rematar con a pobreza, as desigualdatz sozials, descriminazions por motibos de raza, relichión u secso, continan estando parti d’a reyalidat d’a nuestra zebilizazión. O reto ha d’estar de conchuntas, y Aragón ha de chugar o suyo papel.

4.- Empentar pooliticas d’esmelitarizazión de territorios do bi aiga una fuerte presenzia de poblazión zebil, y ista presenzia melitar pribe o desembolique d’o suyo pleno potenzial economico y sozial.

Pero tamién ye ora d’empentar politicas de chirmandat, ye á dizir, de relazions economicas y d’amanamiento con emigrants aragoneses y/u os suyos deszendientz, amostrando Aragón como un país batalero á o mundo, no escluyent, y que da oportunidatz á totz ixos que ban emigrar ta que puedan tornar-ie.

Un Aragón en o mundo ye simplament a consecuenzia natural d’un Aragón fuerte, responsable, con un desembolique sustenible, progresista, sozial y rico. Ye un reto que emos de planteyar-nos seriosament.