Tierra Aragonesa. Identidad y soberanía

• Foro
• Blogs
• Bideos
• Galería Fotografica
• Facebook
• Afillar-se
• Ficha Simpatizant
• Boletín Notizias
• Aria Pribata
• Campaña Firmas
• Campaña Fueros
• Decumentos
• Botiga
• TA en a Prensa
• Fe a tuya proposa
• Ayuta economica
• Da-nos a tuya opinión
• Organizazión

Ambiesta Europeya

Aragón, á o largo d’a historia, ha partizipato en o desembolique d’Europa y ba estar mientres sieglos un actor prenzipal. A nuestra politica mediterrania y continental, o nuestro sistema churidico, unibersidatz, o comerzio maritimo y a partizipazión en conflitos meyebals, dica la paz d’Utrech, meten en relieu ista afirmazión.

A clamada Corona d’Aragón, una federazión de reinos y países, arrocló en o suyo inte os autuals territorios d’Aragón, Catalunya, Balenzia y Balears en España, Prenzipato d’Andorra, Corzega, Rossellón, Ozitania Luengadoc en Franzia, Cerdeña, Sizilia y Nápols en Italia, asinas como lo Peloponeso en Grazia, y Nabarra por a relazión primichenia que nos chune, asinas como de bezindat. Con totz ixos pueblos, Aragón tiene una relazión espezial de chirmandat, por razons istoricas.

O restablimiento d’a Corona d’Aragón como una nueba endrezera de l’ambiesta mediterrania d’Aragón, por meyo d’a creyazión d’una comunidat economica y cultural con os territorios europeyos que istoricament en formón parti en un inte d’a istoria, ye una ozión cheoestratechica de muitismo potenzial ta o desembolique economico, sozial y politico d’os aragoneses, y que sin de dandalos nos reendrezarba atra begata enta un papel relebant d’a politica europeya y internazional.

A creyazión d’una macrorrechión europeya que arrocle á totz istos territorios y países, y que inspire a bisión nazional de totz os suyos miembros, se combierte en un d’os nuestros ochetibos alazetals. Una macrorrechión d’istas carauteristicas aberba de mantener un estatus espezial en o sino d’a Unión Europeya.

D’atro costato, no nos podemos olbidar d’os pueblos d’Europa como autualment pasa. A representazión d’os pueblos d’Europa ye en a prautica inesistent, y no para cuenta en a reyalidat sozial d’os estatos miembro. Una Europa d’os ziudadanos pasa por estar construyita dende os suyos pueblos y as suyas nazions naturals. A situazión autual ye contraria á os prenzipios democraticos, ye por ixo que creyemos de raso impreszindible una funda reforma. A representazión dreita d’os pueblos d’Europa en o parlamento europeyo entendemos que ye a unica traza d’empezipiar á construyir una berdadera Europa sozial.

Europa ha de combertir-se definitibament en un espazio sozial y economico que aduye á o establimiento d’un marco d’estabilidat global europeyo en os dos aspeutos. En l’aspeuto sozial, Europa no ha preso grans iniciatibas dica l’inte, estando ísta la gran faina pendient. Una Europa chunita no puede dixar d’estar sozial. O liberalismo en Europa con regularidat ba dillá d’as mugas de l’ochetibo que han de tener totz os países: cusirar por o bienestar de totz os ziudadanos. L’ambiesta de Tierra Aragonesa ye a d’una Europa sozial. A Europa d’o ziudadano ha de prebalexer á os meros intreses economicos.